AASU-te'n Citizenship Act siamṭhat duh lo

All Assam Students Union (AASU) chuan Citizenship Amendment Bill, 2016 an pawm theih loh thu sawiin, Citizenship Act siamṭhat an duh loh thu Thawhṭanni khan sorkar laipuiah an thlen.

AASU chuan Assam-a district leh subdivisional headquarters hrang hrangah te Citizenship Act siamṭhat duh lohna kawngzawh an huaihawt tur thu sawiin, October 22 hian Guwahati-ah lungawilohna lantir leh an tum a ni. AASU leader Samujjal Bhattacharyya chuan Bangladesh aṭangin Assam-ah dan kalhin Hindu eng emaw zat an lut tih sawiin, kum 1971 hnu lama rawn lut te hnena khua leh tui nihna pek chu an duh lo tih a sawi. State sorkar leh sorkar laipui chu dan loa Bangladesh aṭanga Assam-a lut ṭhinte dang tur leh titawp turin an phut tih sawiin, hun rei tak harsatna an lo tawh tawh chu chinfel thuai a nih theih nan chak zawka hma la tura an phut thu a sawi.

Bhattacharyya chuan kum 1985 khan sorkar laipui chuan AASU leh All Assam Gana Sangram Parishad-te chu inremna a lo ziahpui tawh tih sawiin, kum 1971 hnu lama Bangladesh aṭanga Hindu leh Muslim lo lut te chu an rama thawn kir vek turin inremna ziak a ni, a ti. Harsatna hrang hrang karah inremna thuthlung ziah a ni a, chu chu India sorkar hian a hlamchhiah mai a thiang lo, ram anga ṭanrual a ngai a ni, a ti. Citizenship Act siam
ṭhat duh lohna lantir zel an tum thu sawiin, Assam-a pawl 28 zet chuan an thlawp niin a sawi bawk. All Assam Students Union (AASU) leader Samujjal Bhattacharyya chuan Assam mipuite chuan Bangladesh aṭanga pemlutte chu khua leh tuiah an pawm thei lo tih a sawi bawk.

Sorkar laipui chuan Citizenship Act siam-
ṭha turin Citizenship Amendment Bill, 2016 a duang a, hei hi mi tam tak chuan ṭha an tih loh thu an sawi tawh. Assam chief minister hlui Tarun Gogoi-a pawhin he bill hi pawm theih a nih loh thu sawiin, a bikin hmarchhak state-te tan chuan a pawi thei hle dawn niin a sawi. Citizenship Amendment Bill, 2016 hi pass a nih chuan Hindu, Muslim, Kristian leh sakhaw dang zuitu, Afghanistan, Bangladesh leh Pakistan aṭanga India rama lutte chu khua leh tui nihna pek theih an ni dawn a ni. Hei hi BJP kaihhruai NDA sorkar policy pakhat zinga mi niin, BJP-in India chu Hindu ramah siam tuma a hmalakna niah ngaih a ni.