Arunachal CM-in e-ticketing system thar tlangzarh

Arunachal Chief Mi-nister Pema Khandu chuan electronic ticketing (e-ticket) system thar chu Thawhṭannni khan a hawng.

Arunachal Pradesh State Transport Services (APSTS) enkawl, state bus service te chuan electronic ticketing (e-ticket) system thar hi an hmang dawn a, mipuiten awlsam zawka ticket an lak theih nan 'e-ticket' hi hman a nih tur thu Arunachal Chief Minister chuan a sawi. Khandu chuan hmasawnna kawng pawimawh tak a nih thu sawiin, service dangah pawh hman a nih zel theih nan ruahmanna siam a nih thu a sawi. Passenger-te chuan awlsam zawk leh rang zawkin online-in ticket an book thei tawh dawn a, a ṭangkai thei hle dawn a ni, a ti.

Chief Minister chuan online hian ticket a book hmasa ber a, ticket book-tute chu SMS leh email hmangin confirmation message thawn an ni dawn tih a sawi. Electronic ticketing (e-ticket) system thar hian chhiah lak kawngah pawh nasa takin a pui thei dawn tih sawiin, transport department chuan ni 45 ral hmain e-ticketing atan hian mobile application thar an tlangzarh leh dawn a ni, a ti. State khawpui Itanagar-a bus station zawng zawngah electronic ticketing (e-ticket) system chu hman vek a nih tur thu a sawi bawk.

Chief Secretary Shakun-tala Gamlin-i chuan trans-port department enkawl lirthei hlui zual te chu a thara thlak a nih tur thu a sawi.Transport department General Manager Abu Tayeng pawhin state bus srvice zawng zawngah Closed-circuit television (CCTV) camera dah vek a ni dawn tih a sawi bawk.