Manipur : BSF Jawan chhungte hnenah Rs nuai 10 pe dawn

Manipur sorkar chuan Jammu & Kashmir-a RS Pura huamchhung, international ramri kaltlanga inbeihnaa Pakistan sipaiten an kahhlum, BSF constable Deepak Chingakham chhungte hnenah Rs nuai 10 zangnadawmna atan pek an nih tur thu a puang.

Thawhṭannia press release siamah, PRO Raj Bhavan, Imphal chuan state sorkar chuan martar leh a chhungte tan major Laishram Jyotin Singh Ashok Chakra (P) scheme hnuaiah zangnadawmna hi pek a ni dawn tih a puang a ni.

"Tun hnaia Indo-Pak ramria buaina chhuak, May 10, 2025-a Pakistan aṭanga Kharkhola Border Outpost (BOP) drone hmanga beih a nih hnuah 7th Battalion, Border Security Force (BSF) constable (General Duty) Deepak Chingakham (25) chuan a nunna a hlan a ni," tiin thuchhuah chuan a tarlang.

Constable Chimngakham ruang hi nimin khan Imphal-ah phurh haw a ni a, Bir Tikendrajit International Airport, Imphal-ah zahna lantirin a pualin hun hman a nia, he hunah hian Governor leh state mi pawimawh tak takte an tel. Hemi hnu hian a pianna, Imphal East district-a Yairipok Mathak Leikai-ah chawimawina nen vuina hun hman a ni.