Manipur Cabinet-in Pony humhalhna tur policy pawm

Manipur Cabinet chuan sakawr te chi, pony humhalhna tura 'Manipuri Pony Conservation and Development Policy' duan chu a pawm niin Chief Minister O Ibobi Singh chuan a sawi.

Pony-te hi hmun danga hmuh tur awm zen zen lo an ni a, ramsa mang mai thei te zinga mi a ni. Manipur Cabinet chuan hemi chungchang hi ngun taka a ngaihtuah hnuah, pony-te humhalhna tura policy duan chu a pawm ta niin, Rural Development Minister Moirangthem Okendro chuan a sawi. Okendro chuan, kum 2003-ah pony hi 1898 an awm tih sawiin, 2012-ah chuan 1101-ah a tlahniam a ni, a ti. He policy atan hian State Veterinary & Animal Husbandary Department chu nodal department atan thlan a ni a, Chief Minister kaihhruaina hnuaiah 'Manipuri Pony Development Board' din a nih tur thu a sawi.

Cabinet chuan Police station dinbelh a remti bawk a, police out post thar 14 dinna tur a pawm. Kangvai, Behiang, Sagang, Leimakhong, Kangchup, Ningthoukhong, Wangjing, Irong Chesaba, Chandrakhong Mayai Keithel leh Tulihal airport-ah te police station dahbelh a ni ang. Cabinet chuan police outpost dinna tur a ruahman nghal a, Hiyangthang Lairembi, Langol Laimanai, Nungei, Moirangpalli, Athokpam, Tentha, Tekcham, Leishangthem, Lambui, Nungleiband, Ragailong, S. Kholian, Tingpui, Kabui leh Nongdam-ah te din a ni ang.

Manipur cabinet chuan Inspector lakbelh a remti a, Sub-Inspector, ASI, Head constable, Police Constable leh driver lakbelh a remti bawk. Ruahman dan chuan police outpost zawng zawngah SI, ASI, Head constable, Police constable 30 bakah driver pathum
ṭheuh dah a ni ang. Manipur Cabinet chuan Non-Specialist doctor-te pension kum chu, kum 60 aṭangin 62-ah pawhsei a remti bawk.