Nagaland-ah Women Police Station hawng

Nagaland Director General of Police (DGP) L. L. Doungel chuan Nagaland-a hmeichhe police station hmasa ber chu, state khawpui Kohima-ah Thawhlehni khan hawn a ni.

Women police station-ah hian hmeichhe police 26 an awm a, Inspector Ari Thapru chuan a ho dawn a ni. Nagaland DGP chuan station thar hi a hawng a, district dangah pawh hawn belh zel tum a nih thu a sawi. DGP chuan mipa leh hmeichhia te inkarah intluktlanna a awm theih nana hmalakna pakhat a nih thu sawiin, hmeichhe awm nem zawkte chunga pawikhawina thleng ṭhin do letna tur a nih thu a sawi bawk. Women police station chu hmeichhe tana din a nih ang ngeiin, hmeichhe thubuai bik ngaihtuah a ni ang, a ti bawk.

Deputy Inspector General (Range) Limasunep Jamir chuan hmeichhe tana station din chu hmasawnna a nih thu sawiin, station hran din chu thil tih makmawh a ni tih a sawi bawk. Jamir chuan kum 2015 chhungin hmeichhe thubuai bik 23 lai ziahluh a nih thu leh, an zinga 21 te thubuai siamsak an nih thu a sawi. Kumin bikah thubuai 21 ziahluh a ni tawh a, mi 17 te chu thubuai awrh tir an ni. Hmarchhak state Nagaland bakah hian Meghalaya-ah hmeichhe police station hi din a lo ni tawh bawk.