Mary Kom leh BJP inhnimhnai

Manipur boxer chhuan vawr Mangte Chung-neijang (M.C.) Mary Kom-i chuan Bharatiya Janata Party (BJP) a zawm dawn nia tarlan a ni.

Mary Kom hi Prime Minister Narendra Modi chuan April 25, 2016 khan Rajya Sabha member atan a nominate a, April 24, 2022 thleng Rajya Sabha MP nihna hi a chelh dawn a ni. Hetih lai hian nakkum-a Manipur State Assembly Election neih turah Kom hi BJP ticket-in a ding dawn niin an tarlang. Manipur-ah hian BJP chuan thawm an nei lian sawt hle a, Congress party-in kum 15 chhung ro a lo rel tawhna chu paihthlak tumin hma an la mek a ni. Hemi kawngah hian BJP chuan Kom hi hman ṭangkai an tum nia sawi a ni a, BJP-ah lawmluh a nih thuai dawn rin a ni.

BJP chuan Kom hi tlang-rama cheng tribal mite vote lak nan an duh nia sawi a ni a, amah hi hill district-a Churachandpur-a cheng niin tribal a ni. October 17 khan Kom hian North East Democratic Alliance hruaitu Himanta Biswa Sarmachu Imphal-ah kawmin, a hmalam hun tur a sawipui a ni. Hemi ṭuma an thlalak hi Sarma chuan Twitter leh Facebook page-ah a tarlang a, ngaihven a hlawh hle. Hetih lai hian media lam pawhin Kom hi BJP tan a campaign ngei dawn niin an tarlang bawk.

Manipur-ah hian BJP chuan an huang an zauh chak hle a, tun hnaiah Congress MLA pathum chu an party-ah an lawm lut. Manipur-ah hian hill district-a cheng te chuan Congress sorkar duh lohna an lantir mek a, a bikin tribal MLA te chu MLA an nihna bansan a, Congress chhuahsan turin an nawr a ni. Manipur-ah hian Assam ang bawkin BJP chuan sorkarna a chan mai ringtu an tam sawt hle.