Assam : Air India-in June aṭangin Silchar service ti tawp dawn

Air India chuan Assam-a Silchar Airport-a kum 70 dawn an lo service tawh chu kumin June 1 aṭangin a ti tawp dawn tih a sawi a, he airport aṭanga flight hnuhnung ber chu May 31,2025-ah thlawh tir a ni ang.

Kum 1955-a Indian Airlines-in Barak Valley biala air connectivity a awm ṭan tirh aṭanga khan Air India hi service a ni. Service ti tawp tura thutlukna an siam chungchangah official-a sawifiahna an la nei lo a, mahse industry lama mi thiamte chuan helai huamchhunga buaina leh venhimna lama harsatna an tawh nasat zual avang niin an ngai.

May 31 hnu lama booking nei passenger-te chu Air India be pawp turin an hriattir a, rescheduling, refund, emaw an thlawh chhuah dan tur chungchang zawtfiah turin an ngen.

Air India-in Silchar service ti tawp dawn mah se IndiGo leh Allaince Air chu Silchar leh India ram khawpui lian leh pawimawh inkarah an la service chhunzawm dawn thung. Mahse thlawhtheihna a tlem tawh dawn a, eng anga zingin nge thlawh tir an nih dawn tih sawichian a la ni lo bawk.

Tualchhunga stakeholder-te chuan Air India service tih tawp hian sum leh pai leh hmasawnna lamah nghawng a nei dawn niin an sawi. Silchar Airport hi Assam khawthlang lam leh a ṭhenawm state-te tana pawiawh tak a ni a, service tih tawpn a nih chuan an state-a khualzin lut a ti tlem dawn a, inkalpawhna lam an neih tlem phah dawn bawk a ni.

Barak Democratic Front (BDF) chuan Air India service tih tawp a ni tur chu an dem thu sawiin, Barak Valley-a kum tam tak chhung flight service rintlak ber a nih laia thutlukna mak tak an siam chu pawi an ti hle tih an sawi. An thutlukna siam hi ennawn a, sut leh tura an duh thu an tarlang bawk.