Agartala-Akhaura rel kawng peih thuai tum

Ministry of External Affairs official chuan Bangladesh leh Arunachal Pradesh inkalpawhna tur rel kawng km 15.054 a thui chu, kum hnih leh a chanve chhunga zawh hman tum a nih thu Nilaini khan a puang.

Rel kawng siam tur hian Arunachal Pradesh khawpui Agartala leh Bangladesh-a Akhaura khua chu a thlunzawm dawn a ni. MEA Joint Secretary A K Gupte chuan, rel kawng siam tur zinga km 5 chu India ram chhungah a awm dawn a, a bak chu Bangladesh ram chhungah a awm ang, a ti. Project hi kum hnih leh a chanve chhungin zawhfel hman tura ruahman a ni a, hna ṭan thuai a nih tur thu a sawi bawk. He project atan hian cheng vaibelchhe 972.52 ruahman a ni a, a senso hi India chuan a tum dawn a ni. India ram chhunga km 5-a thui kawng siamna senso hi Development of North Eastern Region (DoNER) chuan a tum dawn a, Bangladesh ram chhunga rel kawng siamna senso hi sorkar laipuia Ministry of External Affairs-in a tum ang.

He project atan hian 'Project Steering Committee' din a ni a, India leh Bangladesh aiawhte an tel a ni. Nilaini khan project chungchangah hian a vawi ngana atan meeting neih a ni a, Bangladesh aiawhin Additional Secretary of Roads and Railway, Sashi Singh chu telin, India aiawhte chu MEA Joint Secretary A K Gupta chuan a ho ve bawk. Ram pahnih aiawhte chuan Agartala-Akhaura rel kawng siam chu insumdawn tawnna leh kawng hrang hranga inkalpawh nan ruahman a nih thu an sawi. Tunah hian Bangladesh paltlangin, New Delhi aṭanga West Bengal leh Tripura kalpawhna tur rel kawng siam turin ruahmanna a awm mek bawk.

Bangladesh Prime Minister Sheikh Hasina-i'n January 2010-a India a rawn tlawh ṭumin Akhaura - Agartala inkalpawhna tur relkawng siam tur hian inremna an lo siam tawh a ni.