Manipur hi eng tikah mah Greater Nagaland-ah tel dawn lo : Ibobi

22nd October, 2016

Manipur Chief Minister Okram Ibobi Singh chuan an state-in dan leh thupek kenkawh kawngah hma a sawn thu sawiin, Manipur chu eng tikah mah Greater Nagaland siam tumah telh a ni dawn lo tih a sawi.

Chief Minister chuan Naga homeland-a Manipur tel tir tum ṭalh chu thil atthlak tak a nih thu sawiin, eng tikah mah an state chu Greater Nagaland a ni dawn lo tih a sawi. Ramri fel tak a awm a, chu chu siam ṭhat theih a ni lo a, thil tih chi pawh a ni lo a ni, a ti.

Manipur assembly election an hmachhawn tur chungchang sawiin, boruak muanawm tak hnuaiah mipui ten vote an thlak a duh thu a sawi. Dan leh thupek kenkawh kawngah sorkar chuan nasa takin hma a la tih sawiin, tun din hmunah boruak a ralmuan thu a sawi. Ibobi Singh chuan, dan khauh taka kenkawh a nih avangin sumdawng leh dawr neitute pawh zan rei tak tak thleng an inhawn theih tawh thu a sawi a, chu chuan boruak a ralmuang tawh hle a ni tih a lantir a ni, a ti. Helte nekchepa an awm thu sawiin, tun hnaia pawikhawina thleng a awm lo tih a sawi.

Ibobi chuan, helte chuan tun hma angin hills area-ah awmhmun an khuar thei lo tih sawiin, Suspension of Operations (SoO) pact ziah a nih hnuah tribal te chenna hmun chu a him chhoh tak thu a sawi bawk.

Manipur-ah hian Central security force leh state police-te chuan khauh takin venhim hna an thawk a, buaina chhuak tam zawk chu Naga helte chetna nia tarlan a ni. Manipur-ah hian Naga hel National Socialist Council of Nagaland (Khaplang) - NSCN (K) te chuan security force-te an bei fo ṭhin. August 12, 2004 khan, assembly segment pasarih-ah Armed Forces (Special Powers) Act, 1958, hlih a nih thu Ibobi chuan a sawi a, tun dinhmunah segment dangah AFSPA hlih tumna a awm loh thu a sawi a ni. Hetih lai hian AFSPA chungchangah sorkar laipui chuan state sorkar a thlawp ṭha lo tih a sawi.

Chief Minister Okram Ibobi chuan Manipur ramri chu kham ṭhat theih a ni loh thu sawiin, Naga homeland-a Assam, Manipur leh Arunachal Pradesh rin luh tum phet chu thil dik lo hul hual a ni, a ti bawk.