Khandu-a'n War Memorial tlawh

Arunachal Chief Minister Pema Khandu chuan Ningani khan Tawang-a War Memorial a tlawh a, kum 1962-a India leh China indo ṭuma thi te zahna a hlan.

CM Khandu chuan, "Hnam tana nun hlana martar te hian zah an phu em em a, engtikah mah hnam tana nun an hlanna hi theinghilh a ni tawh lo ang" a ti. War Memorial chu India tan a pawimawh em em a, mipui nawlpuiin an hlut deuh deuh a, tlawhtu pawh an pun zel theih nan humhalh a, vawnṭaht a ngai am Tawang mipuite pawhin a venhim kawngah hma an lak a ngai a ni tiin, khualzin te hip thei tur khawpa siam tum a nih thu a sawi. War Memorial hi India sipai, China nena indo ṭuma thi ta mi 2420-te puala siam niin, Namgyal Chorten tia sawi a ni bawk.

Pema Khandu hi 190 Mountain Brigade Commander, Brigadier MP Singh chuan a ṭawiawm a, a ni pawh hian India sipai thi te zahna a lantir ve bawk. GOC-in-C of Eastern Command hlui Lt Gen HS Kalkat chuan War Memorial hi November 2, 1999 khan India sorkar kutah a lo hlan tawh a, Buddhist sakhaw hotu Dalai Lama chuan sipai thi ta te hi mal a lo sawm tawh a ni. He War Memorial-ah hian India flag, Army flag leh Air Force flag zar a nih bakah, kum 1962 indo-a sipai thite pualin flag rawng hrang 27 tar a ni bawk.