Assam : GNRC Hospital hnenah zángnadawmna pe turin hriattir

National Consumer Disputes Redressal Commission (NCDRC) chuan, Guwahati Neurological Research Centre (GNRC) Hospital, Assam chu an damlo pakhat an ngaihthah avanga rualbanlohna hial a thlen avangin mawhphurna la a, zángnadawmna Rs nuai 20 pe turin a hriattir.

Arunachal Pradesh-a cheng, Takam James chuan NRC Hospital doctor pathum - Navanil Barua, Bivan Bihari Dey, leh Monoj Agarwal-te lakah complain theh lutin, damdawi-ina enkawl a nih chhungin amah enkawlna kawngah an ngaihsak loh thu sawiin, hei vang hian hriselna lamah harsatna lian tak a tawh phah a, nasa lehzuala inenkawl chhunzawm a ngaih phah niin a sawi. A complaint theh luh hi NCDRC chuan a ngaihtuah hnuah April 30 khan thutlukna hi a lo siam tawh a, a tira zangnadawmna pe tura a tih Rs vbc 12.4 chu document duhthusam ang a awm loh avangin a tam lutuk tiin, a ennawn leh a ni.

Complaint theh luttu, James hian NRC Hospital-ah an enkawlna a dawn ṭhat loh avangin ram chhung hmun dang hospital hrang hrang a pan kual a ngaih leh phah a, heng zingah hian a zinkawng pawh hautak tak Tamil Nadu-a Vellore pawh a pan tel.

Commission chuan James hian a inenkawlna hmasaa ngaihsak a hlawh ṭhat loh avang hian damdawi lama inenkawl zui reng a ngaih phah tawh dawn a ni tih sawiin, Subhash Chandra leh AVM J. Rajendra (Retd.) te awmna Commission chuan doctor pathumte hi an inthlahdah leh tih sual manah James hnenah zangnadawmna Rs nuai 20 pe turin an hriattir.