Sansad Ratna Award dawng tur zingah Assam MP Dilip Saikia a tel

Assam BJP MP Dilip Saikia chu Parliament-a che ṭhate chawimawina, Sansad Ratna Award 2025 dawng tura thlan a ni. July thla tawp lama New Delhi-a awards semna inkhawm, vawi 15-na neih tura parliamentarian dang 16 bakah parliamentary committee pahnihte hnenah chawimawina hi hlan a ni ang.

Sansad Ratna Awards Committee chuan Pathianni khan he chawimawina hi parliamentary democracy tana thawhhlawk bikte chawimawina a nih tur thu an puang a, chung zingah chuan debate, zawhna siam, leh private member bill siamte pawh a tel.

President hlui Dr APJ Abdul Kalam-a rawtna angin kum 2010 khan he awards hi buatsaih ṭan niin, civil society aiawhin Parliament member hna thawk ṭhate hlan an ni. Kumin chawimawina hlan inkhawmah hian "Outstanding and Consistent Contribution to Parliamentary Democracy" tih Special Award pali pek a ni dawn a, Bhartruhari Mahtab (BJP, Odisha), NK Premachandran (RSP, Kerala), Supriya Sule (NCP SP, Maharashtra), leh Shrirang Appa Barne (Shiv Sena, Maharashtra) te hnenah hlan a ni ang. Heng lawmaker-te hi Lok Sabha term 16-na leh 17-na chhung zawng khan che ṭha ber an ni a, tuna Lok Sabha 18-naah pawh an hnathawh entawn tlak tak an chhunzawm zel a ni.

Maharashtra chuan chawimawina dawngtu pasarih neiin hma an hruai a, Uttar Pradesh, Jharkhand, leh Rajasthan-te chuan chawimawina dawngtu pahnih ve vein an dawt a ni. Odisha, Tamil Nadu, Kerala, leh Assam-te chuan chawimawina dawng tur pakhat ṭheuh an nei bawk.