Meghalaya: CM-in Tangmang a tlawh

Meghalaya chief minister Conrad K. Sangma chuan East Khasi Hills-a Pynursla sub-division hnuaia Tangmang khua chu a vawikhatna atan tlawhin, Chief Minister ni lai zinga he khua tlawh hmasa ber a ni. Kut hnathawktute tih chakna leh thingtlang eizawnna tih changtlunna tura hmalakna hrang hrang a puang nghal bawk.

Kum 200 chuang kaltaa lirnghing vanga hmun danga awmte'n an din, Tangmang khaw mite hi kut themthiam tak tak niin, CM Sangma pawhin an kut chhuakte hmuhnawm a tiin a fak hle. Sorkar official-te chu Tangmang-a mau hmanga an thil siamchhuahte chu leisak turin a hriattir nghal a, hei hi an state tlawhtu mi pawimawhte tana thilpek bik atana hman tur a ni.

CM chuan Tangmang a tlawh chu hriatreng tlak a nih thu sawiin, infrastructure project lian tham tak takah an invest rualin mipui khawsak ti sang tura hmalakna kalpui a ṭul thu a sawi bawk. Kuthnathawktute ṭanpui chu a kaihhruai sorkarin a a tum ber a ni tiin, welfare scheme hrang hrang Self Help Group (SHG) leh pawl hrang hrang ṭanpuina hmangin tualchhung mite tih chak leh eizawnna tih changtlun an tum thu a sawi.

Chief Minister chuan Tangmang-ah Handicraft Training Centre din a nih tur thu puangin, he centre-ah hian tunlai infrastructure, machinery leh chenna in tur dah a ni ang. Khawtlang mipuite chu thil siam chhuah lama theihtawp chhuah tur te, state pawn lama hralh chhuah dan dap turin a fuih bawk.