Nagaland : Naupang dikna chanvo humhalhtu pawlin thurawn ti chhuak

Nagaland State Commission for Protection of Child Rights chuan state chhunga naupang tihduhdahna thleng pung zel karah thurawn a ti chhuak a, naupangte dikna leh himna humhalh kawngah khawtlang mite chu fimkhur leh khauh taka hma la turin a chah.

Commission chuan naupang tihduhdahna thleng chu, pawikhawihtu leh naupang inzawmna chu eng pawh ni se, pawm theih a nih loh thu leh dan anga hma la turin thuneitute hriattir a ṭul tih an sawi. Hetiang thil thleng hi inbiakna emaw, inremna emaw hmanga chingfel lo turin an hriattir a, hei hian thil tisualtute a ti huangtau a, rorelna dik kalpuina tur a tichhe bawk a ni, a ti.

POCSO Act 2012 hnuaiah naupang tihduhdahna kaihhnawiha thil sual titu chu jail aṭanga bail theih loh leh, inremna hmanga chinfel theih a ni lo. Commission chuan naupangte chu ram leh hnam hmalam hun atana mi pawimawh an nih thu sawiin, naupangte dikna chanvo humhalh tura an mawhphurhna hlen chhuak turin mipuite a ngen.

Media leh social media platform-te chu naupang tihduhdahna tuartu naupangte nihna humhalh turin a hriattir bawk.