Manipur: Security force-ten media team an dang

Manipur-a Shirui Lily Festival 2025 chhim tura Ukhrul district-a kal tum, media team chu central security force-ten an chuanna, Manipur State Transport (MST) bus an lo dansak avangin nimin zing khan Imphal-ah an kir leh.

Directorate of Information and Public Relations (DIPR)-in media-te tan bika a ruahman bus-ah hian DIPR staff-te nen journalist 20 vel an chuang a ni. Zing dar 6:30 vel khan DIPR office aṭangin festival hawnnaa tel turin an chhuak a, mahse Imphal aṭanga km 25 vela hla, Imphal East Gwaltabi checkpoint-ah security force, MAHAR Regiment leh BSF te chuan an lo dang a ni.

BSF-te chuan media team chuanna bus-a ‘Manipur State Transport’ tih inziak chu khuh bo turin an ti a, hei hi lehkhain an khuh a, mahse MAHAR Regiment lam chuan an khuh chung pawhin bus hi an tlan tlang an phalsak ta chuang lo a ni. Journalist-te chuan Manipur state chhunga state sorkar label thup a ngai chu an hriatthiam loh thu an sawi. He thil thleng hian press zalenna, himna leh state-a venhimna boruak awm mek chungchangah ngaihtuahna a ti thui hle a, thupek siam a nih chhan chiang zawka hriat an phut thu an tarlang. Imphal lam an pan a, hemi hnu hian an hna chhunzawm turin lirthei dang hmangin festival lawmna hmun an pan leh.

Security force-te hun rei tak an lo ti khawtlai avangin media team hi festival ṭan hun an nang hman tawh lo a, hei vang hian private motor man chawia hmangin Imphal lamah an kir leh ta a ni. MST bus-a ‘Manipur State Bus’ inziak pawh rawngin kah hliah tir a nih hnuah security force lam hian an chhuah tir ve leh bawk.