Nagaland: Tiam chin awm loa sumdawnna hmun khar ti tawp

Nagaland district pakuaa District Chamber of Commerce and Industry (DCCI) in Thawhṭanni aṭanga tiam chin awm loa sumdawnna hmun an khar chu nimin khan tih tawp leh nghal a ni.

DCCI pakuate hian district headquarters urban local body-a an aiawh pakhat ṭheuh ruat tura state sorkar phutin, an thil phut nawrna atan shutdown hi an puang a ni.

Confederation of Nagaland Chamber of Commerce and Industry (CNCCI) president, Khekugha Muru chuan Thawhṭanni tlaia press conference a neihah, sorkarin an thil phut chungchang chu cabinet meeting hmasa ber emaw, assembly session neih leh hmasak ber turah emaw ngaihtuah a tiam avangin nawrh tih tawp a nih thu hi a puang.

District pakua - Dimapur, Chumoukedima, Niuland, Peren, Wokha, Zunheboto, Phek, Tseminyu leh Meluri-a shutdown huaihawt chu 100% in a hlawhtling tih a sawi. Thil ṭha lo leh buaina thleng a awm loh thu sawiin, sorkarin a thutiam a vawn loh chuan state chhunga district 17-ah sumdawnna zawng zawng khar vek a nih tur thu a sawi bawk.