Sikkim: PM-in Sikkim a tlawh a tum

Prime minister Narendra Modi chuan May 29-a Sikkim state-in kum 50 tlin lawmna a neih turah telpui a tum niin chief minister Prem Singh Tamang chuan a sawi. Prime Minister Office aṭangin thutlukna la dawng lo mahse, tih tur pawimawh dang zawng zawng chu tih fel vek a nih tawh thu a sawi.

Chief Minister Tamang chuan Paljor Stadium-ah PM lo lawm tur hian mi nuai khat vel an tel dawn niin a tarlang. A hma chuan Manan Kendra-a programme hman turin an lo ruahman tawh a, mahse he hmunah hian mipui an len tam dawn loh avangin a hmun hi an thlak leh tih thuthar thehdarhtute a hrilh.

PM Modi hian an state tlawh chu a ngai pawimawh hle a, a kal tur thu pawh an tih chian thuai a beisei thu a sawi. An hun hman tur hi an state leh ram tana hun pawimawh tak a nih avangin PM pawh hi a lo kal ngei ang, tiin a sawi.

Inrinni liam ta khan PM-in a tlawh tur atana inbuatsaihna te ennawnin high-level meeting neih a ni a, chief administrator-cum-cabinet secretary VB Pathak leh chief secretary R Telang ten an kaihruai a ni. Meeting-ah hian venhimna kalpui dan tur sawi hoin, cultural programme neih turte, PM project hawn leh lungphum phum turte pawh tih fel a ni bawk.