Assam: Jorhat police-ten mi 24 chhanchhuak

Assam-a Jorhat Police-te chuan Arunachal Pradesh-a West Kameng district huamchhunga Rupa aṭangin mihring hmanga sumdawnna, human trafficking tuartu mi 24 chhanchhuakin, an vai hian Assam thingpui huana thawkte vek an ni.

Chhanchhuah hna thawh hi May 15 leh 17 khan thawh hniha neih niin mi pahnih - Sonowal Seuji Gaon-a cheng Lakshman Dutta (59) leh Dahingeapar Tea Estate-a cheng Pitka Majhi (31) te chu man an ni bawk. Anni pahnih hian April thla khan Tezpur-a hnathawh tur hmuhsak anga thlemin ruihhlo hmanga hrai ruih an nih hnuah, state pawn lamah hian an hruai ta a ni. An mi hruai chhuahte hi Arunachal-ah hlawh nei loin hna thawh tir an ni a, zing dar 6 aṭanga tlai dar 5 thlenga hna an thawh bakah, mobile phone nei loin ralṭi takin an awm tih an sawi.

April 27-a hnathawk tura chhuak pakhat bo zui ta nupui, Gauri Sahu-i'n complaint a thehluh hnuah police-te hian chhanchhuah hna hi an thawk ta a ni. Jorhat SP Shwetank Mishra chuan hnathawk tura thlem chhuahte hian Tezpur pan turah an inngai a, mahse Arunachal Pradesh-ah hruai an ni zawk tih a sawi. Mi pariat chhanchhuah an nih hnuah, May 15 khan Assam-ah hruai haw an ni a, a hnuah mi dang hi hruai haw ve leh an ni.

Anti-trafficking group-te chuan hetiang network hi Assam thingpui huanah a hluar hle niin an sawi a, dinhmun harsa zawk leh hmeichhiate chu hna pek tiamin an thlem a, hmu dangah an hralh ṭhin niin an sawi. Police-te chuan hetiang tuartu dangte zawn chhuah leh mihring hmanga sumdawnna kalpuina tih chhiat tumin chhui chian hna an thawk mek a ni.