AP sorkarin chhawmdawlna pe dawn
Arunachal Pradesh sorkar chuan an state mi leh sa, lockdown puan vanga ram chhung hmun danga tangkhang mekte chu sum lama chhawmdawlna a pe dawn.
State cabinet chuan hmun danga tangkhang mekte hi Chief Ministers Relief Fund (CMRF) aṭangin Rs 3,500 ṭheuh pek a rel a ni. Hmun danga tangkhang te hi an an awmna district thuneitute hnena aṭanga finfiah an nih hnuah, an bialtu MLA-te kal tlangin an bank account-ah pawisa hi thunsak an ni ang.
AP sorkar hian PM- KISAN scheme hnuaia loneitute inziak lutte chhawmdawlna turin a thawh khatna atan cheng vaibelchhe 7.16 a pe chhuak. He scheme hnuaiah hian sorkar laipuiin loneitute chhawmdawlna a pek bakah, state sorkarin Rs 1,000 ṭheuh a pek belh dawn a ni.