Meghalaya: Jowai hospital-in Rs vbc 1 dawng

Meghalaya chief minister Conrad K. Sangma chuan Thawhlehni khan Meghalaya Healthcare Advancement Policy (MHAP) hnuaia not-for-profit healthcare institutions tih changtlunna dawng tura thlan zinga mi, Jowai-a Dr Norman Tunnel Hospital hnenah Rs vbc 1 a hlan.

Jowai Hospital hi MHAP hnuaiah Rs vbc 2 dawng tura tih a ni a, a sum dawn tur thawh hnihna hi an fund dawn hmasak zawk an hman dante an thehluh hnuah pek chhuah an ni ang.

Dr. Norman Tunnel Hospital hi non-for-profit hospital panga thlan chhuah zingah telin, heng damdawi-in panga tih changtlunna tur hian MHAP chuan Rs vbc 10 a ruahman a ni. Hemi atan hian mission hnuaia medical institution leh ṭanpui hna thawktu pawlte nen an thawk ho a ni.

Chief Minister chuan a kaihhruai sorkar chuan state chhunga mission hospital hrang hrangte chu thawh hona ṭha tak siampui a tum a ni tih a sawi a, vawi khat chauh tih tur ni loin tun hi an thawh hona bul an ṭanna tur a ni, a ti. A ṭul angin scheme pawh hi thlak danglam theih tur a ni tiin, institution mamawhte chu dah pawimawh hmasak a ni dawn tih a sawi.

Rev. S. Lamare-a chuan an hun hman hi kaihhruaiin, sorkarin ṭanpuina a pek avangin lawmthu a sawi a, infrastructure tih hmasawn leh nursing education ṭanpui chhunzawm zel turin a ngen.

Hospital medical superintendent Dr. D. Nongpluh pawhin an mamawhte sawiin, renal dialysis unit neih thuai a ngaih thu te, he natna vei an pun zel thu a sawi.

CM Sangma chuan sorkar department, mission hospital, leh health sector-a stakeholder-te nen inbiakna leh thawh hona siamna turin state-level healthcare conference buatsaih an tum thu a puang nghal bawk.