Sikkim-in 2027-ah ziak leh chhiar thiam vekna state nih tum

Sikkim chief minister Prem Singh Tamang chuan state-in kum 50 chhunga hma a sawnna tur hmachhawp a siamte sawiin, heng zingah hian kum 2027-a ziak leh chhiar thiam vekna state nih an tumna pawh a tel. Tunah hian state chhunga ziak leh chhiar thiam hi 90% chunglam a ni mek a ni.

New Delhi-a India Today-in State of States Conclave a buatsaiha thu a sawiah, Chief Minister Tamang chuan zirna sang zawk zir tura Sikkim zirlaite state pawn lama an chhuah a ngaih tawh lohna turin university tam zawk din an tum thu a puang. Ram chhung hmun danga zirlaite chuan lehkha zir turin Sikkim an rawn pan tawh zawk dawn a ni, a ti.

CM Tamang chuan Sikkim chu India rama state hausa ber pawla siam tura a hmathlir neihte a sawi a, "Kum 2027-ah chuan Sikkim chu ziak leh chhiar thiam vekna state-ah siam kan tum a ni," tiin a kaihhruai sorkar chuan zirna chu an ngaihpawimawh tak a nih thu a sawi.

Kum 2019-a Tamang a CM aṭang khan Sikkim hian hma a sawn chho hle. A term tir lamah COVID-19 hri lengin ti buai mah se a kaihhruai sorkar chuan infrastructure pawimawh zual leh social sector hmasawnna lam a ngaih pawimawh hle a ni. Tunah hian district hospital tinah dialysis center leh cancer enkawlna hmun an nei tawh.

Rel kawng pawh kum 2026-ah a tlang tawh dawn a, hei hian tourism leh state economy lamah hmasawnna a thlen thei dawn bawk a ni.