PM Modi-a'n 'Rising North East Investors Summit' a hawng; Company lianten hmarchhak tan investment tih tur puang

Prime minister Narendra Modi chuan nimin, May 23, 2025 khan Bharat Mandapam, New Delhi-ah ni hnih awh tur, "Rising North East Investors Summit, 2025' a hawng. He hunah hian hmarchhak biala chief minister te, union minister leh ram dang palaite bakah ram chhunga industry hotu lian - Mukesh Ambani, Gautam Adani leh Anil Agarwal te pawh an tel.

Prime Minister chuan hmarchhak bialah hmasawnna nasa tak hmuh tur a awm a, sorkar laipui pawhin theihtawp a chhuah zel dawn tih a sawi. A kaihhruai sorkar chuan EAST tih chu "Empower, Act, Strengthen and Transform" tihna a ni tiin, hmarchhak bial chu ramri bula awm tih chauha hriat te lo ni tawh ṭhin mah se, tunah chuan India-in hma a sawnna kawnga a hma tawngtu a ni chho tawh a ni, a ti. Bomb, silai leh rocket tih nena hriat kawp ṭhinah hian kum 10 liam ta chhung khan tharum thawhna leh helna bansan turin ṭhalai 10,000 chuang an inpe tawh a ni, tiin Modi chujan a tarlang.

'Rising North East Investors Summit' kaltlang hmarchhak bialah ramchhung bakah ram dang aṭanga investor-te hip luh an beisei thu PM chuan a sawi bawk. Summit chhung hian ministerial session, business-to-government session, business-to-business meetings, start ups leh policy exhibition te bakah, state sorkar leh sorkar laipui ministry hrang hrangten investment atana an hmalakna te pho lan a ni bawk ang.

Company-ten investment lian tham an puang

'Rising North East Investors Summit' nimina neiha ram chhunga company liante chuan hmarchhak bial tih hmasawnna tura investment lian tham tak tak tih an tum thu an puang.

Reliance Industries leh Adani group chuan hmarchhak bial tan investment tam tham tak tih an tiam. Reliance-in Rs vbc 75,000 leh Adani Group-in Rs vbc 50,000 invest an tum thu an puang. Vedanta Group pawhin Rs vbc 80,000 an invest dawn tih puangin, private-sector zingah hmarchhak tana investment ti lian ber an ni dawn.

Vedanta Group hian kumin Advantage Assam 2.0 summit neiha khan Rs vbc 50,000 investment a tih dawn thu a lo puang tawh. Nimina summit-ah Vedanta Group chairman Anil Agarwal chuan Rs vbc 30,000 an invest belh leh dawn tih puangin, hmarchhaka hna thawhna tura a ruahman hi Rs vbc 80,000 a tling ta a ni. State paruk - Assam, Arunchal Pradesh, Nagaland, Tripura, Meghalaya leh Mizoram-ah an invest dawn tih sawiin, sector hrang hrang - oil and gas, minerals, refining, renewable energy, power transmission, data center, optical fiber network lamah hma an la dawn tih an tarlang. An hmalakna hmang hian ṭhalai nuai khat ve tan hna an siamsak thei dawn tih an sawi bawk.

Reliance Industries chairman, Mukesh Ambani chuan investment an tih tur hi puangin hmarchhak bialah a bikin Arunchal Pradesh leh Nagaland tana a hmathlir neihte a sawi. 'Hmarchhak bial kan ṭhenawm ram, Singapore te anga hlawhtlinna hi an la hmu dawn a ni," a ti. Company hian kum sawm li chhung atana hmarchhak tana Rs vbc 30,000 a invest chu Rs vbc 75,000 ah a ti puang dawn a ni. Jio, Reliance telecom hi hmarchhak bialah 90% vel hmangtu awmin, 5G subscriber maktaduai 5 vel an awm bawk. Kumin chhung hian artificial intelligence (AI) chu an subscriber tih punna atan school hrang hrang, damdawiin, sumdawnna hmun leh chenna inah te kalpui an tum bawk. Reliance Retail chuan hmarchhak bial agrilculture lama loneitute sum lakluh tihhmasawnna atan staple, thei leh thlai te an leisak dawn bawk a ni.

Adani Group chairman Gautam Adani pawhin hmarchhak bialah Rs vbc 50,000 invest belh an tum thu a sawi. Infrastructure, logistics network, energy project leh digital connectivity lamah an insawrbing dawn tih a sawi.

Reliance leh Adani Group-in investment an tih tur hian hmarchhak bial economy ṭhanna kawngah a pui dawn a, ṭhalai tam tak tan hna a siamsak dawn bawk a ni.