Tripura : Agartala leh Guwahati inkarah rel service thar awm dawn

Tripura-a railway infrastructure tih changtlunna atan, sorkar laipui chuan Agartala leh Guwahati (Narangi) inkarah rel a service tir dawn. West Tripura Parliament member leh Tripura chief minister hlui Biplab Kumar Deb-a'n ngenna a siam hnuah sorkar laipui chuan a ngenna hi a tih hlawhtlinsak dawn ta a ni.

Deb chuan Facebook-ah prime minister Narendra Modi leh union railway minister Ashwini Vaishnaw ten Agartala-Guwahati route-a rel service thar neih an remtihsak avanga lawmthu sawiin, Tripura mipuite ngenna an zahsak vang leh khualzinte nuam taka an zin veivah theihna tur an ngaihpawimawh sak avangin lawmthu a sawi.

April 22 khan Deb hian union railway minister Ashwini Vaishnaw chu New Delhi-ah a hmu a, state chhunga rel service thar a awm theihna turin leh, express train thar bakah infrastructure awm sa tih changtlung a ngaih thute a sawi a ni. An inkawm hnu thla khat pawh ral hmain a ngenna thlente chu pawmsak a ni ta a ni.