Assam : Kuminah Silchar greenfield airport siam ṭan tum

Assam chief minister Himanta Biswa Sarma chuan kumin chhung ngeiin Silchar-ah greenfield airport siam hna thawh ṭan tum a nih thu nimin khan a puang.

Chief Minister hian tun hnaia union civil aviation minister Kinjarapu Ram Mohan Naidu hmuin, hmarchhak biala air connectivity tih chak leh infrastructure tih changtlun dan turte an sawi dun thu a official X-ah a tarlang. 'Silchar greenfield airport siam hna pawh kuminah ngei ṭan hman tum a ni," a ti.

Union Minoister chuan Assam-a Rupsi airport zauh pawh a lo tiam nia sawiin, Sarma chuan state chhung khawpui lian - Jorhat, Dibrugarh leh Silchar-te pawh India ram khawpui dangte nen awlsam zawka intlawhpawh theihna turin flight connection thar siam theih beisei a nih thu a sawi bawk.

Assam sorkar hian Cachar district-a Doloo-a greenfield airport a siam tur atan hian nikum February thla khan Civil Aviation Ministry-a Steering Committee aṭangin remtihna a dawng tawh a ni. Kumin February thla khan Airports Authority of India (AAI) chu project thawh ṭan a nih thuai theihna atan Detailed Project Report (DPR) theh lut tura tih a ni bawk. Tunah chuan a tihfel ngaite ti fel tawhin, a takin hna an thawk ṭan thei dawn ta a ni. He airport hi siam zawh a nih chuan a bikin Assam chhim lam bial tan a ṭangkai zual dawn hle a ni.