Sikkim : NDA meeting-ah CM tel

Sikkim chief minister Prem Singh Tamang chu National Democratic Alliance (NDA) meeting, New Delhi-a neihah a tel. Meeting hi Pathianni leh nimin khan neih a nia , prime minister Narendra Modi-a'n a kaihruai a ni. BJP national president J.P Nadda, union home minister Amit Shah, defence minister Rajnath Singh, union minister dangte leh NDA sorkarna state Chief Minister-te bakah NDA-a tel party hruaitute an tel bawk.

CM Tamang chuan sorkar laipuiin a thlawpna leh kaihhruaina avangin Prime Minister hnenah lawmthu a sawi a, a bik takin COVID-19 hripui len lai leh khaurel chhiatna thlen changa sorkar laipui aṭanga chhawmdawlna an dawn ṭhin a lawm hle tih a sawi a, Prime Minister rorelna chu entawntlak a tih thu a sawi.

Kum 2014 aṭanga hmarchhak bial hmasawnnate sawilangin, Chief Minister chuan PM Modi kaihhruaina hnuaiah hmarchhak bial chu ngaihven a nih bakah hmasawnna tam tak hmuh tur a awm a ni, a ti.

Hmarchhak bial, tun hmaa political platform ni ṭhin chu tunah chuan hmasawnna tam tak thlenna hmun a nih tawh thu leh, sector hrang hrangah hmasawnna a awm thu Tamang chuan a sawi. State-in Golden Jubilee an lawm laia Prime Minister leh BJP hruaitu senior ten an thlawp tlat avanga lawmthu sawiin, thawh hona ṭha tak nena hmalam pan a, hlawhtlinna ngelnghet a awm theihna turin inlungrualna ṭha neih a pawimawh thu a sawi bawk.