Nagaland : Reservation policy ennawn phutin nawrh huaihawt dawn

Nagaland-a hnam panga aiawh telna committee chuan state sorkar hnena reservation policy ennawn tura an ngen tawh chu nawr turin naktuk, May 29 hian nawrh huaihawt an tum tih an sawi.

Five Tribes Committee on the Review of Reservation Policy convenor Tesinlo Semy leh member secretary, GK Zhimomi chuan hnam pangaa thuneitu sangten joint meeting an neihah, nawrh huaihawt hi rel a nih thu sawiin he hunah hian ṭhalai leh zirlai pawlte pawh an tel vek dawn tih an sawi. Meeting hi May 24 khan CPO Hall, Chümoukedima ah neih a ni.

Panel-ah hian Angami Public Organisation, Ao Senden, Lotha Hoho, Rengma Hoho leh Sumi Hoho tribe aiawhte an tel.

Committee chuan kum 2024, September 20 khan reservation policy ennawn tura ngenna hi state sorkar hnenah an theh lut tawh a, sorkarin hma a lak zui loh avangin kumin April 26 khan ni 30 hun an pe leh tih an sawi. Hemi chhung pawha an ngenna chungchang sorkar lamin a ngaihven zui loh avangin heng hnam pangate chenna district headquarters hrang hrangah nawrh hi huaihawt an tum ta tih an tarlang.

May 29-a hian district headquarters-ahte deputy commissioner office panin kawng hi zawh a ni dawn a, an thil phut tarlanna memorandum chu district administrator-te kaltlangin sorkarah theh luh a ni ang. Panel chuan an nawrh huaihawt turah ṭawiawm ṭha turin hnam panga te chu an ngen a, review comittee hrang hrang din lo ni tawh mah se tun thlengin non-backward tribe te ngenna siam chu ngaihsak a la hlawh lo niin an sawi.