Tripura : Kum 32 hnuah Kailashahar airport hawn leh tum

Tripura-a Unakoti district-a Kailashahar airport, kum 32 zet hman tawh loh chu hman leh theih tura buaipui mek a ni.

Thawhṭanni khan Airport Authority of India high-level team chuan hun rei tak hluihlawn tawh airport hi a hmunah kalin an enfiah a ni. He hmuna flight service kalpui a nih leh theih dan turte an zirchiang ang.

State chhunga political leh non-political organisation hrang hrang chuan Kailashahar Airport hawng leh tur hian hun rei tak an lo nawr tawh a ni. Rorellai Bharatiya Janata Party (BJP) chuan sorkarna an chan chuan hawn leh ngei a lo tiam tawh a, tunah hian state leh central-a sorkarna an siam mek avangin an thutiam ti hlawhtling tur hian hma an la mek a ni.

Airport dinhmunte an enfiah hnua thuthar lakhawmtute an kawmnaah, AAI North Eastern Regional Director, M. Rajkishore chuan enfiah hmasak chu an zo tawh tih sawiin, state sorkar nen inberawnin hma lak zel dan turte an sawi ho dawn tih a tarlang. 'Mi nawlpuiin an chhawr theih tur eng ang service nge helai hmunah hian siam tur tihte pawh kan ngaihtuah dawn a ni," a ti.