Assam sorkarin electronic siamtute 'top-up' incentive pek belh tiam

Assam chief minister Himanta Biswa Sarma chuan electronics siam chhuaktuten Assam-ah an thil siam chhuahna hmunte an bun a nih chuan, sorkar laipui aṭanga incentive an dawn bakah state sorkarin top up incentive a lo pek belh tur thu a sawi.

Chief Minister Sarma hian Thawhṭannia New Delhi-a Electronics Round Table 2025 buatsaiha semiconductor industry aiawhte nena inkawmna an neihah a sawi a ni. Sarma hian Mumbai, Chennai leh Bengaluru-a industry member-te chu inkawmna a neihpui bawk.

CM chuan, "Sorkar laipuiin Electronics Manufacturing Component Scheme leh programme dang hnuaia incentive a pek chu, 60% incentive kan lo pek belh ang," tiin Assam-a electronics siam chhuaktute sawm luh theih ngei a tum.

Assam sorkar hian National Highway 37 dunga awm, Jagiroad chu electronic city-a siam tumin hma a la mek a ni. Hemi atan hian Asian Development Bank pawh loan tam tham tak dilin inbiakna an neih mek thu CM chuan a sawi. Assam Skills University dinna turin loan phalsak an ni tawh bawk.