Tripura : Private school-te CCTV vuah vek turin hriattir

Tripura sorkar chuan an state-a private school zawng zawngte chu school luhna, chhuahna leh a huam chhung enfiah ngai zual hmunahte CCTV vuah vek tura a hriattir thu High Court a hrilh.

State sorkar hian High Court-in May 8, 2025-a school himna chungchanga Public Interest Litigation (PIL) theh luh a ngaihtuahnaah he thu hi a sawi a ni. PIL hi advocate Kundan Pandey theh luh a ni a, hearing neihnaah hian state sorkar aiawhin advocate general Shaktimoy Chakraborty leh Pinki Chakraborty an inlan.

Sorkar aiawhte chuan hma an lak dan hrang hrangte court hi hrilhin, April 28 khan Nazrul Kalakhetra, Agartala-ah private school aiawh zawng zawng koh khawm a ni a, CCTV camera dah chungchang bakah tui thianghlim dah te, mipa leh hmeichhe tana toilet hran siam leh, ruihhlo ti lo tura hma lak dan chungchangte sawi ho a nih thu a hriattir. Sorkarin affidavit a theh luhah hian private school 484 te chuan zirlai naupangte tan tui thianghlim pekna leh toilet an nei vek tih sawiin, a tam zawkin CCTV camera hi an dah tawh bawk. A la dah lote pawhin dah thuai an tiam bawk a ni.

Hriattirna pek zawm lote chungah action lak a nih tur thu state sorkar chuan sawiin, school recognition pawh hlihsakin, UDISE code pawh hnawl a ni dawn tih a sawi.