Manipur MLA 10-in Governor an hmu

Manipur MLA 10 chuan nimin khan governor Ajay Kumar Bhalla chu Raj Bhavan, Imphal-ah hmuin sorkarna an siam theih thu an thlen. An zingah hian BJP MLA pariat an tel.

Independent MLA Sapam Nishikanta Singh chuan state mipui tam zawkin mipui sorkar siam thuai an duh thu sawiin, hei hi Governor an hmuh chhan ber pawh a ni tih a sawi. "Thil dang tam tak pawh kan sawipui a, a pawimawh ber erawh chu mipuite duh dan anga mipui sorkar siam a ni. Governor pawhin min lo dawngsawng ṭha hle," a ti.

Singh chuan sorkar thar din a nih thuai a beisei thu sawiin,MLA 22-te hming sign-na lehkha pawh an thehlut tih a sawi. "Manipur-a NDA MLA zawng zawng chuan sorkar thar din thuai an duh vek a, mipui pawhin min thlawp ṭhat hle kan ring," tiin a sawi. Thawhlehni khan chief minister hlui N Biren Singh chuan an state dinhmun chu Governor a sawipui thu a tarlang bawk. Gwaltab-a May 20-a security force-ten Shirui Lily festival chhim tur, journalist-te chuanna state transport bus an lo dan avanga lungawi lo, Imphal Valley-a nawrh huaihawt pawh chinfel dan ngaihtuah tur a, inbiakna neihpui turin Governor hi a ngen bawk.

Manipur-ah hian May 2023 khan Meitei leh Kuki-Zo hnam inkarah buaina chhuakin, tun thlengin buaina hi a la reh thei lo a ni. Buaina chhuak vang hian mi 260 chuangin nunna anchan tawh a, mi sang telin an in leh lo an tlanchhiatsan bawk. N Biren Singh chuan chief minister a nihna aṭanga banna a theh luh hnuah, a thlaktu tur an thlan theih loh avangin kumin February 13 aṭang khan President's Rule puan a ni.