Arunachal : Rights group-in mega dam siam dodaltute thlawp

Arunachal Pradesh-a Siang region-a mega dam siam tum duh lohna lantir mek chu rights group pathum - Manipur-a Centre for Research and Advocacy, Sikkim-a Affected Citizens of Teesta, leh Tripura-a Borok People’s Human Rights Organisation te chuan an thlawp thu an sawi.

Rights group pathumte hain Arunachal Pradesh sorkarin lawyer-activist Ebo Mili thubuai a siamsak chu an dem thu an tarlang bawk. Siang district deputy commissioner, P.K. Thungon chuan Ebo Mili hi mega dam siamna tur endik tura secuirty force kalte lo dang tura Adi hnamte fuihpawrhah puhin a laka FIR a thehlut a, thubuai siamsak a a ni zui a ni.

Siang, Upper Siang leh West Siang district-a khaw hrang hrangte chuan May 22 aṭang khan 11,000 megawatt Siang Upper Multi-purpose Hydroelectric Project (SUMP) siamna tumna duh loin security force tirh an nih avanga lungawi loin nawrh an huaihawt tawh a ni. Tualchhung mite chuan Siang lui hi 'Ane' tiin, Adi hnam ṭawnga 'nu' tihna a ni a, he lui hi an hnam tana hmun pawimawh tak a ni a, humhalh an duh thu an sawi.

Rights group-te chuan SUMP hian Adi hnam leh an ramte a ṭha lo zawnga a nghawng bakah, lui mawng lama chengte tan harsatna lian tak thlenin, Assam tan pawh tuilian a thlen mai a hlauhthawnawm thu an sawi. 'He dam siam tumin hian a chhehvel bial tan chhiatna hlauhawm tak thlen theihna a ti zual a ni," an ti. Sorkar laipui chu Adi hnama iawhate leh SUMP siam tumin a nghawng thei hrang hrangte inbiakna neihpui tur leh, Mili thubuai siamsak sut turin an phut.

Hetih lai hian state police-te chuan SUMP project dodal leh, he hmuna enfiah tura kal security force-te lo dana lungawi lohna lantir a nih chungchangah tualchhung mipuite fuiha pawn lam mi an inrawlh thu a sawi. SUMP chu sorkar laipui hmalakna a ni a, thla ruk kalta khan district thuneitute pawhin security clearance an pek tawh thu IGP Hibu Tamang chuan an sawi. Project chungchangah thu dik tawk lo thehdarh a nih ṭhin avangin buaina hi a punlun phah niin a sawi bawk.