Khaw chhiat vangin PM-in Sikkim zin tur ṭhulh

Prime minister Narendra Modi-a'n Sikkim state kum 50 tlin lawmna hmanpui tura nimina Sikkim zin a tum chu khaw chhiat vangin a ṭhulh a, Bagdogra aṭangin video conference hmangin state mipuite tan thuchah a sawi.

Prime Minister Modi chuan a zin tur ṭhulh a ngai chu pawi a tih thu a sawi a, zingah khan Delhi aṭa ngin Bagdogra a pan a, mahse khaw a chhiat zui tam em avangin a kal chhunzawm thei ta lo tih a sawi. State mipuite hnenah ngaihdam a dil zui bawk. 'Chief Minister in min sawm tawh angin, state sorkarin remchang dang a ruat hunah, Sikkim state kum 50 tlin lawmna poual hian ka la rawn zin ngei ang," tiin a tiam.

Sikkim sorkarin nimina state kum 50 tlin lawmna puala Gangtok-a "Sikkim@50: Where Progress Meets Purpose and Nature Nurtures Growth" programme a siam hmanpui tur hian PM hi sawm a ni, a awm chhungin state chhunga hmasawnna hna thawhna tur project hrang hrang hawng tura tih a ni bawk.

Chief minister Prem Singh Tamang chuan an programme buatsaih chu PM-in a tum angin a hmunah rawn hmanpui thei ta lo mah se Sikkim mipuiten an lo lawm reng tih a sawi. An state kum 50 tlin hi kum tluanin an la lawm dawn a, a lawmna eng maw ber chu a la hmanpui theih an beisei thu leh, a telpui a nih chuan an lawm hle tur thu a sawi bawk.