June 2-ah Meghalaya leh Assam CM inhmu dawn

Meghalaya chief minister Conrad K Sangma chuan June 2 hian Guwahati-ah Assam chief minister Himanta Biswa Sarma hmuin, ramri chungchanga buaina an la neihte chinfel dan an sawi dun leh dawn tih Meghalaya chief secretary Donald Philips Wahlang chuan a sawi.

Assam leh Meghalaya hian ramria hmun 12-ah buaina an nei a, mahse heng zinga parukah chuan kum 2022 khan CM pahnih inbiakna kaltlangin inremna an lo ziak tawh a ni. Hmun paruk danga inremna siam leh tur hian hma an la mek bawk.

Chief Secretary chuan ramri buaina an la neihte enfiah tura ruat, regional committe pathum chuan state sorkar hnenah report an la theh lut lo tih a sawi.

Assam CM Sarma pawhin Meghalaya nena ramri buaina an la neihte chu chinfel thuai an duh thu leh, inremna pawh an siam thuai theih a beisei thu a lo sawi ve tawh bawk.

State pahnihte hian ramri km 885-a thui neiin, hmun paruk Tarabari, Gizang, Hahim, Boklapara, Khanapar-Pillangkata leh Ratacheera an buaina square km 36.79 huam chhungah chuan give-and-take policy hmangin inremna hi an siam tawh a ni. An inremna siam hnuaiah hian Meghalaya kuta square km 18.28 pek niin Assam hian square km 18.51 a nei a ni.