Manipur lui hrang hrang tui chim chin a sang

Manipur-ah ruah sur nasa avangin lui lian hrang hrangah tui chim chin a sang tawh hle a, tuilian thlen mai hlauhthawnawmin an awm mek. State khawpui, Imphal khawchhungah pawh tui a tling nasa hle.

Manipur Water Resource Deparment-a Flood Control Room in a tarlan danin, lui ṭhenkhatah chuan tuiin a kuang a liam tawh tih an sawi. A bikin Imphal West district-a Nambul leh Nambol lui tui a tam zual a, Nambul lui tui chim chin chuan meter 781 tling tawhin warning level a thleng teuh tawh hle. Kakching district-a Shekmai lui pawhin Wabagai Terapiskhak area-a leilette a chim tawh a ni.

Myanmar ramri bul, Chandel district-a Maha lui chuan danger level a thleng tawh a, Chakpi lui tui pawhin a chim sang tawh hle bawk. Loktak Lake tui pawh a sang chak hle a ni.

Hetih lai hian India Meteorological Department (IMD chuan state chhung hmun hrang hrangah ruah a la sur chhunzawm dawn tih a sawi. A bikin Chandel, Churachandpur, Pherzawl district bakah Kakching leh Thoubal hmun ṭhenkhatah a sur nasa dawn niin a tarlang.

Thuneitute chuan mipui chu fimkhur tura chahin pawn chhuak tam lo turin a ngen a, khaw chin a ziaawm hma chu leileta feh lo leh sangha man rih lo turin an ngen. Lui hnaih lamah phei chuan kal lo turin an ngen a ni.