Sikkim Chief Minister - Pawan Kumar Chamling

Sikkim chief minister atana a zawna vawi nga thlan tlin tawh, Pawan Chamling hi 22 September 1950 khan South Sikkim-a Yangang khuaah a piang a, Sikkim chief minister ni thei pangana chiah a ni.

Pawan Chamling hi Sikkim Demo-cratic Front founder president niin, kum 1994 aṭang khan SDF hian sorkarna changin, tun thlengin ala sorkar a ni.

Chamling hi India ramah a zawna Chief Minister ni rei ber ni mekin, legislative assembly election-ah a zawnin ṭum nga hnehna a chang tawh. Sikkim hian kum 2019-ah election a hmachhawn leh dawn a, Chamling hian a term a hmang zo a nih chuan kum 25 chhung state chief minister ṭhutthleng a luah dawn a ni. 28th April 2018 khian India rama chief minister dinhmun luah rei ber a ni thei dawn a, he hun hi a hmang thlen ngei pawh a rinawm. Tun dinhmunah, West Bengal Chief Minister hlui Jyoti Basu chu chief minister ni rei thei ber niin, June 1977 aṭanga November 6, 2000 thleng CM dinhmun hi luahin, kum 23, thla li leh ni 16 chhung ro a rel a ni.

Politics bulṭanna

Chamling hi kum 1982 khan Yangang Gram Panchayat president atan thlan a ni. Heta ṭang hian hawilet tawh loin, kum 1985 khan a vawikhat nan Sikkim Legislative Assembly Election-ah a ding a, thlan tlin zui a ni. A ṭum hnihna atan Damthang bial-ah thlan tlin leh niin, hetih laia Sikkim chief minister Nar Bahadur Bhandari chuan Industries, Information and Public Relations Minister atan a ruat a, kum 1989-1992 chhung enkawl. Kum 1993 March 4 khan Chamling chuan Sikkim Democratic Front a din zui ta a ni. Sikkim Democratic Front hian kum 1994 inthlanah hnehna chang zui nghalin, Sikkim Legislative Assembly election 1999, 2004, 2009 leh 2014-ah te a zawnin thlan tlin an ni. Kum 2009 election-ah khan Chamling-a kaihhruai Sikkim Democratic Front chuan assembly seat awm zawng zawng 32 a la fai vek a ni.

Chamling hi May 21, 2014 khan a ṭum ngana atan Sikkim Governor Shriniwas Dadasaheb Patil chuan rinawmna thu tiam tirin chief minister atan a la lut a, West Bengal chief minister hlui Jyoti Basu-a'n term nga chhung chief minister nihna a lo chelh tawh record chu a nih rual a ni. Tunah hian Sikkim assembly seat 32 awmah, Sikkim Democratic Front chuan chuan seat 28 a nei a ni.

Organic state

Sikkim hi India rama 'Organic State' hmasa ber a ni a, January 18 2016 khan Prime Minister Narendra Modi chuan India rama 'Organic State' hmasa ber leh awm chhunah a puang. 'Organic State'-ah puan a nih theih nan hian chief minister Chamling hian fak a hlawh hle a, a policy ṭhat vang leh a hna thawh ṭhat te avangin chawimawina hlan hial a ni.

Chawimawina

Sikkim Chief Minister Pawan Chamling hi tun hnai khan ‘Sus-tainable Development Leadership Award’ hlan a ni. Award hi President Pranab Mukherjee chuan a hlan a ni. Chamling hi environment and sustainable development lama a hnathawh ṭhat vang te, organic state an nih theih nana a hmalakna te avangin he award hi hlan a ni. Sikkim-ah hian National Programme for Organic Production Scheme kalpui a ni a, hei hi state sorkar chuan a hlawhtlinpui hle. Ministry of drinking water and sanitation-in “Swachh Survekshan Gramin 2016 ” report a tih chhuah thar berah, Sikkim chu India rama state fai berah thlan a ni. Faina kawnga an hna thawhṭhat avang hian Ministry of Drinking Water and Sanitation chuan award a lo hlan tawh a, national awards for Swacch Bharat Mission award bakah, 'Prime Minister award for excellence in public administration' hlan an lo ni tawh bawk.

Heng zawng zawnga an hlawh-tlinnaah hian CM Pawan Chamling chuan fak a hlawh hle. Pawan Chamling hian mimal leh state sorkar angin chawimawna ṭhahnem tak a dawng tawh a ni.