Pul-a thih danah Forensic report tichhuak

Arunachal Pradseh chief minister hlui Kahlikho Pul-a thih dan chungchanga forensic report tih chhuahah, mani intihhlum a nih theihna chu 99% vel a nih thu State DGP S Nithiyanandam chuan a sawi.

Pul-a thih dan kimchang hi Guwahati-a Forensic Science laboratory-ah zirchian a ni a, report tihchhuah a ni tawh. DGP S Nithiyanandam chuan report aṭanga a lan danah chuan Pul hi mahni intuhlum ngei nia ngaih a ni, mahni intihlum a nih theihna hi 99% lai a ni, a ti. Arunachal CM hlui hi August 9 khan CM bungalow-ah inawkhluma hmuh a ni a, July 13-a Supreme Court-in Arunachal-ah Congress sorkar din leh tura thupek a tihchhuah hnua thil thleng a ni. Pul hi Congress MLA niin, khatih hun laia chief minister Nabamtuki-a kaihhruai sorkarah helin, amah leh Congress MLA dang eng emaw zat chuan Congress chhuahsanin sorkar thar an din a ni. Mahse Supreme Court chuan Congress sorkar paihthlak danah thil dik lo a awm nia sawiin, Congress sorkar din leh turin a hriattir a ni.

Forensic report hi court-ah thehluh a ni dawn a, court chuan thutlukna a siam dawn a ni. Pul-a thih dan chhui tur hian state sorkar chuan magisterial inquiry a din a ni. Hetih lai hian Election Commission chuan October 17 khan, Pul-a bial Hayuliang Assembly constituency-a by-election neih hun tur a puang a, November 19-ah by-election hi neih a ni ang. Sorkar lai People's Party of Arunachal (PPA) leh Bharatiya Janata Party (BJP) te chuan joint candidate an neih tur thu an puang tawh a ni.