Manipur University : Tribal-te'n lungawilohna lantir zel October 31 aṭangin class ṭan dawn

Manipur University-a Academic Council-in admission an kalpui dan duh loh vanga hun eng emaw chen University khar a nih hnuah, October 31 aṭangin class ṭan a ni dawn. Hetih lai hian tribal zirlaite chuan lungawilohna an lantir zel.

Vice Chancellor in-charge Prof Yumnam chuan Academic Council-in reservation policy a lo siam tawh chungchangah hian, Deans leh University-a Head of Department-te chu meeting a neihpui a, meeting chuan Academic Council-in October 8-a reservation policy a lo pawm tawh chu an nemnghet nawn a ni. Ruahman dan chuan October 29-ah admission zawhfel a, October 31-ah class ṭan tura tih a ni. University thuchhuah chhuan, admission criteria chu kum 2012 khan Manipur state mila siamrem a nih thu tarlangin, hemi ngaihtuah tur hian special committee din a nih thu a tarlang. Committee-ah hian expert eng emaw zat awmin, anni hian kum 2012 khan reservation policy thar an duang a, hei hi nakkuma session ṭan hma ngeiin University Grants Commission (UGC) leh Ministry for Constitutional Amendment-ah thlen a nih tur thu tarlan a ni. Admission criteria duan thar erawh hman a la ni dawn lo.

Admission chungchangah hian Academic Council chu thuneihna sang ber neitu a ni a, a thutlukna siam chu University Chancellor emaw Visitor-te bakin an tidanglam thei lo. MU-ah hian Scheduled Caste (SC) tan seat 15% hauhsak mek an ni a, Scheduled Tribe (ST) tan 7.5% leh Other Backword Classes (OBC) tan 27% hauhsak an ni. Hetih lai hian Tribal zirlaite chuan UGC-in dan a zam angin Scheduled Tribe zirlaite tan seat 31% hausak an phut a ni. Tribal-te'n seat hauhsak an phut zat hi hi Academic Council chuan pek theih a nih loh thu a sawi ve thung. Admission chungchangah buaina awm chhoin, tribal zirlai lungawilo te chuan University an bei a, bungrua eng emaw zat an tih chhiat bakah, kangmei a chhuak a ni. Tharum thawhna a thlen hnu hian Univesrsity-a Deparment zawng zawng chu khar nghal a ni. Tribal-te chuan an thil phut a hlawhtlin theih nan kawng hrang hrangin, campus chhung leh pawnah lungawilohna an lan tir zui a ni.

University chuan admission kalpui danah hian Central Educational Institution (Reser-vation in Admission) Act, 2006 hman a nih thu an sawi. Hetih lai hian Manipur University Tribal Student’s Union (MUTSU)-te chuan University thutlukna chu an pawm theih loh thu an sawi a, Pathianni khan emergency meeting an nei leh nghal a ni. MUTSU chuan Manipur-a mihring cheng 40% chu tribal an nih thu sawiin, Central Educational Institutions (Reservation in Admission) Amended Act, 2012 hnuaiah tribal zirlaite tan seat 31% hauhsak an nih thu an sawi. Central Educational Institution (Reservation in Admission) Act, 2006 hmang lo a, Central Educational Institutions (Reservation in Admission) Amended Act, 2012 hman chu an duh ber a nih thu an sawi. An thil phut a hlawhtlin mai loh avang hian kar kalta Inrinni aṭang khan Manipur University kawtah an thil phut a hlawhtlin ngei theih nan chawnghei an kalpui leh a ni.

Manipur University vice-chancellor in-charge, M. Dhane-shwar chu University beih a nih avangin a hna aṭangin a bang a, Prof Yumnam chuan a thlak a ni.

CM-in sorkar laipui

inrawlh turin ngen

Manipur Chief Minister Okram Ibobi Singh chuan Manipur University-a admission chungchanga buainaah sorkar laipui inrawlh turin a ngen. He thu hi All India Radio Imphal-in kawmnaah a sawi chhuak a ni. Ibobi Singh chuan chuan, “MU buaina chu chinfel thuai a nih theih nan Union Human Resources Development Ministry chu inrawlh turin ka ngen a, state sorkar chu pui turin a inpeih reng a ni" a ti. Hun rei tak chhung University khar a ni chu pawi a tih thu sawiin, zirlaite hmakhua ngaia sorkar laipui chu inrawlh thuai turin a ngen tih a sawi. Tharum thawhna thleng chu a dem tak zet tih sawiin, tun hnuah thleng tawh lo tura a duh thu uar takin a sawi bawk.