Tripura jail aṭangin tang tlanchhuak

Tripura police-te chuan Central Jail-a tang mek mi pathum te chu kar kalta Zirtawpni zan khan an tlan chhuak tih an sawi. Jail tang tlanchhuakte hi Milan Debbarma (28), Swarna Kumar (22) leh Rabindra Tripura (24) te an ni.

Tang tlanchhuakte hi dam chhung tang tura tih an ni a, kum 2012 khan thiam loh chantir niin, Central Jail-ah hian dah an ni. Sepahijala district police chief Sudipta Das chuan tang te hi Zirtawpni zan khan Bishalgarh-a Central Jail aṭangin an tlanchhuak tih a sawi a, ngawrh takin a zawn hna thawh nghal a ni, a ti. He thil thleng hi state chhunga police station 74 te chu hriattir nghal an ni a, Bangladesh an luh lohna turin Border Security Force-te chu ramri khar tir nghal an ni bawk.