Arunachal-ah Criminal Tracking Network System tlangzarh

Arunachal Pradesh sorkar chuan kar kalta Inrinni khan State Police department thuamchakna turin, Crime and Criminal Tracking Network System (CCTNS) a tlangzarh.

CCTNS hi sorkar laipui project, National e-Governance Plan hnuai-ah kalpui a ni a, tun lai thiamna hmanga police-te tha tichak tura hmalakna a ni. Police ten rang zawk leh chak zawka hnu chhui an kalpui theih nan te leh kawng hranga hranga an tha tihchak na tura tih a ni. Kum 2008 khan CCTNS project hi duan a ni a, Cabinet Committee on Economic Affairs (CCEA) chuan June 9, 2009 khan a pawmpui a ni. He project hnuaiah hian India rama police station 14,000 zet chu thuam ṭhat tura hmalakna a ni.

Arunachal state police-te'n CCTNS an hman theih nan hian state sorkar,Ministry of Home Affairs leh state project management consultant-te chuan inremna an ziak a ni. Hemi hnu hian state sorkar chuan kum 2012 khan Bharat Sanchar Nigam Limited (BSNL) chu inremna a siampui leh bawk.

State Home Minister Kumar Waii chuan CCTNS project peihfel a ni ta chu lawmawm a tih thu sawiin, state-in kawng tam takah a ṭangkaipui ngei a beisei thu a sawi. Waii chuan Arunachal khawpui Itanagar chu crime-free ah siam tum a nih thu sawiin, mipuite chu thawhpuiah a sawm. He hun hmanpuitu Parliamentary Secretary for Home Pani Taram pawhin, CCTNS chuan kawng tam taka police-te tha a tihchak a beisei thu a sawi. Nodal Officer Jasmeet Singh chuan he hunah hian State crime report a tlangzarh ve bawk. Arunachal-ah hian CCTNS project hnuaiah police station 72, Anti-Human Trafficking Unit leh sorkar hmun pawimawh bikah te Core Application Software (CAS) hman a ni.

Crime and Criminal Tracking Network System (CCTNS) tlang-zarhnaah hian Home Minister Kumar Waii, Parliamentary Secretary for Home Pani Taram, Director General of Police S Nithianandam, IGP Law & Order N Payeng, DIGP Taba Tusar leh IGP (A) Nuzhat Hassan-te an tel a ni.