Assam CM-in ‘Arohan’ tlangzarh

Assam Chief Minister Sarbananda Sonowal chuan kar kalta Inrinni khan Special Mentoring Programme ‘Arohan’ a tlangzarh.

Assam Chief Minister chuan ‘Arohan’ chu state chhunga ṭhalai tam zawkte central service-a an luh theih nana duan a nih thu sawiin, state chhunga IAS, IPS leh IFS officer-te chuan ṭhalai tam zawk central service-ah an luh theihna turin an kaihruai dawn a ni, a ti. Assam-ah IAS, IPS leh IFS officer 200 an awm tih sawiin, central service-ah hei aia tam an luh theihna atana hmalakna a ni, a ti. He hun hmanpuitu Education Minister Dr Himanta Biswa Sarma chuan, ‘Arohan’ chu zirna tihhmasawnna peng pakhat a ni tih sawiin, he programmee hnuaiah hian officer-te chuan state chhunga school leh college hrang hrangte an tlawh ṭhin dawn a ni, a ti. A thawh khatna atan Dibrugarh, Lakhimpur, Morigaon, Kamrup Metro, Barpeta, Chirang, Hailakandi leh West Karbi Anglong district-ah te kalpui thuai a nih tur thu a sawi bawk.