China tan Arunachal chuh buai chi a ni lo : US Ambassador
US Ambassador to India Richard Verma chuan kar kalta Zirtawpni khan Arunachal Pradesh a tlawh a, China tan Arunchal chu chuh buai chi a ni lo, India ta a ni, a ti.
Ambassador Verma chuan United States-in Arunachal Pradesh-ah ambassador a tirh chhan chu India leh China inkar buai chinfel a duh vang a ni, a ti. Verma chuan AP chu India ram a ni a, China tan chuh buai chi a ni lo tiin, ram pahnihte inkarah boruak ralmuang tak a awm US chuan a duh a ni, a ti. Arunachal mipuiten an lo dawnsawn danah a lawm thu sawiin, a hlim hle tih Verma chuan a sawi.
External affairs minister hlui Salman Khurshid pawhin, China chuan Arunachal chu a ram chinah a rin lut thei lo ang, India ta a ni, a ti. Sorkar laipui chu China lakah a ngawi mai mai tur a ni lo, ram pahnihte inkar chingfel turin hma a la tur a ni, a ti. China chet dan chu enliam mai chi a ni loh thu sawiin, India chuan a ṭul ang hma a lak a ngaih thu a sawi. Arunachal Pradesh chu India ta a ni a, ram, dangin an chuh a thiang lo a ni, a ti bawk.
Hetih lai hian Chinese Foreign Ministry thupuangtu Lu Kang chuan US chetdan chu China-in a duh loh thu sawiin, US Ambassador Richard Verma-a'n India-China border a tlawh chungchang sawifiah turin an phut tih a sawi. China chuan Arunachal Pradesh chu southern Tibet peng pakhat a ni tih sawiin, India ram hruaitu ṭhenkhat leh foreign official-te'n an tlawh chu an dem hle tih a tarlang. Verma hian Arunachal Pradesh Chief Minister Pema Khandu an a sawm angin a kal mai niin tarlan thung.
US Ambassador-in Arunachal Pradesh a tlawh chu India External Affairs Ministry thupuangtu Vikas Swarup chuan ṭha a tih loh thu sawiin, India leh China inkarah US a inrawlh a rem lo a ni, a ti. Ram pahnihte chinfel tur a ni a, ram dang inrawlh a remlo a ni, a ti.
India leh China hian hun rei tawh tak aṭangin Arunachal chungchangah hian buaina an nei tawh a, China sipaite India ram chhungah an luh fo avangin an boruak a
ṭha lo hle. Ram inchuh chungchangah hian ram pahnih aiawhte chuan vawi eng emaw zat inbiakna an lo nei tawh a, tun thlengin chinfel erawh a la ni lo. Tun hnai khan Arunchal-ah hian China sipaite an luh nia sawi a nih bakah, camp an din niin media lamah tarlan a ni a, mahse hei hi India chuan a pha thung.
US Ambassador Richard Verma hi Arunachal Pradesh-a Tawang Festival chhim tura sawm nia tarlan a ni.