Hmarchhak tan 'Mobile Air Dispensary'

Sorkar laipui chuan hmarchhak tan 'mobile air dispensary' a ruahman sak niin Minister of State for Development of North Eastern Region (DoNER) Jitendra Singh chuan a sawi.

DoNER minister Jitendra Singh chuan, mobile air dispensary chu hmarchhak hmun kilkhawr zawka awm, doctor leh hospital pan ve thei lo te tana duan a ni tih a sawi. Doctor-te chuan bungrua leh damdawite kengin heng hmun kilkhawr zawka mite hi an pan zung zung thei dawn a ni, a ti. Singh hian ni hnih chamin Manipur a tlawh a, sor-kar laipui ruahmanna hi a sawi chhuak a ni. Manipur a cham chhung hian Governor Najma Heptulla chu kawmin, Australia-in hmun kilkhawr zawka cheng ten doctor enkawlna an dawn ve theihna tura Flying Doctor a din dan te a sawipui a ni.

Singh chuan 'mo-bile air dispensary' chung-chang hi Ministry of Civil Aviation-ah thlen a nih tawh thu sawiin, MoS for Civil Aviation minister Jayant Sinha pawh a sawipui tawh tih a sawi. Hemi atan hian Helicopter company te pawh dawr an ni tawh, a ti. Hemi chungchang hi DoNER Ministry, North Eastern Council, Manipur sorkar leh Union Ministry-a Health official te nen la sawiho leh tur a ni, a ti bawk.

DoNER minister chuan Manipur-ah sports university din a nih theih nan hmalak mek zel a nih thu sawiin, a hmun tur pawh tihfel thuai beisei a ni, a ti. Singh chuan sorkar laipui chuan hmarchhak hmasawnna a ngaipawimawh tih sawiin, state sorkarte chu sorkar laipui hmalakna thlawp turin a chah.