Assam-ah Bodo-te'n rel kawng an dang

All Bodo Students Union (ABSU) leh Bodo pawl hrang hrangten, Assam-a Bodo district-ah Thawhṭanni khan rel kawng an dan a, nunphung a khaihlak nasa hle.

Bodo-te state hran pek phut nana rel kawng an dan tur thu hi kar kalta khan an lo sawi tawh a ni. All Bodo Students Union president Pramod Bodo chuan, state hran pek an nih hma loh chuan kawng hrang hranga hmalak a nih tur thu sawiin, sorkar laipui chu hma la tura an phut thu uar takin a sawi. Thawhṭanni zing dar nga aṭangin rel kawng hi dan a ni a, darkar 12 chhung a awh. Railways official chuan, Bodo district hmun hrang hranga rel service 22 zet chu tihtawp lailawk a ni tih sawiin, heng zingah hian Northeast - Delhi service Rajdhani express pawh a tel a ni. Chirang leh Udalguri district-ah chuan rel service tihtawp lailawk a nih avang hian mipui nawlpuiin harsatna an tawk a, zin vei vak eng emaw zat an tangkhang a ni.

Assam Additional Director General of Police, L.R. Bishnoi chuan railway station hrang hrangah passenger-te'n harsatna an tawk tih sawiin, buaina chhuak thei veng turin police
ṭhahnem tak duty tir an nih thu a sawi. Rel kawng dan chah a nih vang hian buaina chhuak lian tham report a awm lo tih a sawi bawk.

Lungawilohna lantira rel kawng dan hi All Bodo Students Union (ABSU) ten an huaihawt a ni a, People’s Joint Action Committee for Bodoland Movement leh National Demo-cratic Front of Bodoland (P) ten an thlawp a ni. Bodo-te chuan an thil phut a hlawhtling lo a nih chuan, November thla tir lamah nawrh huaihawt leh a nih tur thu sawiin, December-a Parliament winter session neih hunah lungawi lohna lantir an tum thu an sawi. Hei bakah hian January 2017-ah state chhunga National Highway leh Railway te chu dan a nih tur thu an sawi bawk.

Bodo-te hi Assam-ah chuan hnam peng lian ber zing a mi an ni a, kum 1967 aṭang khan state hran phutin sorkar an kar tawh a, tun thlengin pek an la ni lo.