Tripura-a Class 1- 9 zirlaite pawl sawn tir vek

Tripura education minister Ratan Lal Nath chuan an state chhunga Class 1 - 9 zirlaite chu pawl sawn tir vek an ni tih a sawi. Tripura-ah hian lockdown puan a nih avangin zirlaite tan hian  virtual class kalpui mek a ni. 

Minister chuan Covid-19 leng vanga school khar vek a nih avangin Pathianni aṭang khan state chhunga zirlaite tan virtual class kalpui a ni a, local cable channel 14-ah higher secondary level thlengin class  hi neih a ni tih a sawi. Record sa pawh Youtube lamah, 'Tripura Shiksha Bandhu' tih hmingin en theih tura dah a ni bawk. 

Civil secretariat-a chan­chinthar lakhawmtute a kawmnaah Nath chuan, "Lockdown hma khan examination chu neih fel vek hman a ni. Mahse lockdown avangin class neih ṭan mai theih a ni lo a, hei vang hian zirtirna hi apps leh local TV channel kaltlanga pek kan rel a ni. Class pangngai chu May 4 aṭangin neih ṭan theih a ni ang," a ti. 

Minister chuan Class 1-9 zirlaite pawl sawn tir vek an nih thu a sawi rualin, Tripura Board of Secondary Education (TBSE) hnuaia class 10 leh 12 answer sheet chu April 24 aṭangin Agartala-a centre 13-ah endik ṭan a ni dawn tih a sawi. Answer paper endiknaah pawh social distancing dan chu khauh taka kenkawh a nih tur thu a sawi bawk.

Nath chuan degree college 22 leh technical institution pasarih pawhin online class an nei mek tih sawiin, subject leh semester wise-in WhatsApp group pawh siam vek a ni, a ti.