Manipur: Union Home Secretary-in relief camp tlawh

Union home secretary, Govind Mohan kaihhruai high-level team chuan ni hnih chama Manipur tlawhin, an cham chhung hian Churachandpur district-a relief camp pahnih an tlawh.

Manipur Home Department chuan high-level team hian Churachandpur-a Assam Rifles helipad-a an ṭum hnuah Dorcas Veng, New Lamka-a relief camp an tlawh nghal a, he hmunah hian Chief Secretary chuan naupangte pualain Creche facility a hawn bakah, hmeichhiate puala puanṭhui zirna program siam chu a hawng bawk. Hemi hnu hian Sadhbhavna Mandap, Tuibong-a relief camp dang an tlawh leh bawk.

Relief camp pahniha awmte hi official-te chuan kawmin, an mamawh leh hmanraw neihte, camp dinhmunte an enfiah nghal a ni. Camp-a awmte an mamawh hrang hrang an sawite pawh lo ngaihthlak sakin, sorkarin a enkawl zel dawn tihte an hrilh. Home Secretary hian relief camp pahnih aṭanga kumina Secondary leh Higher Secondary Examination-a pass, zirlai 15-te lawmpuina certificate a hlan nghal bawk a ni.

Central team-ah hian Intelligence Bureau director, Tapan Kumar Dek pawh a tel a, Churachandpur district an tlawhnaah hian Manipur Chief Secretary, DGP leh Churachandpur DC bakah official eng emaw zatin an ṭawiawm.