Meghalaya health sector-ah private investment duh lo

Meghalaya chief minister hlui, Leader of Opposition ni mek Dr Mukul Sangma chuan Meghalaya health sector-a private investment luh tir chu a dodal tlat tih a sawi a, mipui hriselna chu ngaih pawimawh hmasak ber tur a ni, a ti.

Sangma hian nimin khan North Garo Hills-a khum 100 awmna tur, Chidaret Civil Hospital sak mek a tlawh a, he project atana hmathlir awmte a sawi rualin, sorkar laipui lam aṭanga puihna a awm theih reng laiin public-private partnerships (PPPs) lam hawi lo tura a duh thu a sawi.

"Health sector-a private investment tih phalsak theiah kan la ding ve lo," tiin a kaihhruai sorkara health infrastructure an ngaih pawimawh dante a sawi. Chidaret Hospital sak hna hi 90% vel zawh tawh niin July thlaah hawn theih beisei a ni. He hospital sakna tur hi a chief minister laia tih fel a ni tiin, an state chu medical hub-a siam theihna tura long-term plan an siam peng pakhat a nih thu a sawi a ni. Hospital sakna, ram acre 100 dawna zau pawh tualchhung miten an pek deuh vek a ni tih sawiin,hospital chauh ni lo medical college pawh la siam theihna tur a nih thu a tarlang. Sangma chuan hmathlir thui tak neia siam a ni tih sawiin, highway project thawh zawh fel a nih hunah Chidaret Civil Hospital chu Assam state khawpui, Guwahati aṭanga pawha darkar hnih vel chauh tlan a nih thu a sawi.