Assam: Chhiatna thlengah mi 19 thi tawh

Assam-a tuilian leh leimin vanga nunna chan chu Nilaini thleng khan mi 19 an tling tawh a, Cachar district-ah mi pakhat chin hriat lohin a awm bawk. Brahmaputra leh lui dang pathumte chu tuilian hlauhawm chhinchhiahna an pel tawh a ni.

Tuilian hian bial 66 huamchhunga thingtlang khua 1,494 ah harsatna a thlen tawh a, Sribhumi chu chhiatna thlen nasatna ber niin khaw 339 ah harsatna an tawk mek. Nagaon ah khaw 189 leh Cachar-a Hailakandi district-ah khaw 156 te chuan buaina an tawk mek bawk a ni. Sribhumi-a cheng mi 2,59,601 bakah Hailakandi-ah mi 1,72,439 leh Nagaon-ah mi 1,02,716 te chu tuilian hian a nghawng niin Assam State Disaster Management Authority (ASDMA) chuan a tarlang.

Thlai chinna hmun hectare 14977.99 a zau pawh tuilian hian a tichhe tawh a, ramsa 5,15,737 velin harsatna an tawk tawh bawk. District thuneitute chuan relief camp 405 siam tawhin, mi 41,317 te an awm lailawk mek a, mamawh lamkhawmna hmun 1,12,324 an siam tawh bawk.

Hmun eng emaw zata kawng, lei, zirna in, Anganwadi centre leh electric ban techu tuilian hian a ti chhia a ni. Chhiatna thlen nasatna hmunte hi Hailakandi, Dibrugarh, Morigaon, Hojai, Kamrup, Nagaon, Golaghat, Biwanath, Cachar, Sribhumi, Sonitpur, Lakhimpur, Darrang, Barpeta, Goalpara, South Salmara, Karbi Anglong West, Dima Hasao, Sivasagar, Kamrup (Metro) leh Dhemaji te an ni.

Northeast Frontier Railway (NFR) thupuangtu chuan Assam chhim lamah rel kawng tuiin a chim avangin rel service a tih buai thu a sawi a, heng rel kawngte hi hman leh thuai a nih theihna turin thawktuten ngawrh takin hma an la mek tih a sawi.