Sikkim: Khualzin tangkhangte chhanchhuak kim

North Sikkim-a ruahsur nasat avanga khualzin la tangkhang 59 te chu nimin khan helicopter hmanga hruai chhuah niin, he hmuna khualzin tang 109 te chu chhanchhuah kim an ni ta. Hetih lai hian sipai camp-a leimin vanga chin hriat loha awm, mi parukte zawn hna chu thawh chhunzawm zel a la ni bawk.

Khualzin 59-te hruai chhuak tur hian MI-17V5 helicopter pahnih chu Chaten-ah hian tirh an ni a, an mi hruai chhuah zingah hian ram dang mi pahnih an tel. Heng khualzinte hi Chaten-a sipai camp leh hotel-ahte dah an ni.

North Sikkim-ah hian lei pawimawh tak pahnih, Taran Chu lui chung, Munshithang leh Chaten inkar ami chu tuilianin a tihchhiat avangin chhanchhuah hna thawh a harsat thu an sawi. Ni thum liamta khan khualzin 1,678 te chu Lachung leh Chungthang aṭanga chhanchhuah an ni tawh a, a dang 33 pawh helicopter hmang hian chhanchhuah an lo ni tawh bawk.

Sikkim chief minister Prem Singh Tamang chuan harsatna thleng vangin Lachen leh Lachung sector chauh khar a ni a, state chhung hmun dangte chu khualzinte tlawh theih tura hawn vek an la ni tih a sawi. Sorkar laipui puihna nen harsatna lian dang a thlen tawh lohna turin theihtawp chhuah mek a nih thu sawiin, an state tlawh chhunzawm zel turin khualzinte a sawm nghal bawk a ni.