Meghalaya: Cabinet-in hydro project atan Rs vbc 30 pawm belh

Meghalaya cabinet chuan West Garo Hills district-a Ganol Stage-I Small Hydro Project thawh zawh taka leiba la awmte chinfelna turin Rs vbc 30 a pawm.

Cabinet-in sum a pawm belh tak nen he project tana sum sen zawng zawng hi Rs vbc 590.88 a tling dawn ta a ni. 22.5 MW project hi hun eng emaw chen tih khawtlai a nih hnuah zawhfel a ni tawh a ni.

Chief minister Conrad K Sangma chuan state in power a mamawhte phuhrukna turin kawng hrang hrangin hma lak zel a ni dawn tih a sawi a, hun rei tak chawlh lailawk tawh Kynshi Stage-I project thawh chhunzawmna turin Athena Projects Private Limited nena inremna siam pawh thawk thar lehin, Memorandum of Agreement ziah ṭhat leh pawh rel a nih thu a sawi. 450 MW pe chhuak thei tura a tira ruahman, Kynshi project-ah hian 270MW chauh a siam chhuak thei dawn tih zirchian hnuah hriat ani a, hei vang hian hna thawh pawh an chawl lailawk a ni. Mahse cabinet chuan Athena nen thawh ho zel an la duh thu an sawi.

Cabinet chuan Riangdo Small Hydro Project 3 MW chu 6MW a tih lenna turin Rs vbc 14 an pawm bawk. Hei bakah Nongmer Small Hudro Project, 24 MW chu public-private partnership anga thawh an remti bawk a, he hmun aṭanga power siam chhuah 30% a lei chhawng dawn a, a thlawnin 12 % a dawng bawk ang.