Manipur Governor-i'n CM beih a dem

Manipur Governor Najma Heptulla-i chuan Chief Minister O Ibobi Singh-a'n Ukhrul district-ah beih a tawk chu a dem tak zet tih a sawi.

Governor Heptulla-i chuan,“He thil thleng hi a pawi takzet a ni, Manipur hian tharum thawhna aiin hmasawnna hna thawh a mamawh zawk a ni" tiin, Ibobi Singh beih a ni chu a dem thu a sawi. Heptulla-i chuan Manipur-a tharum thawhna thleng fo mai chu pawi a tih thu sawiin, "CM hialin beih a tawk hi a demawm tak zet a ni. Sorkarin hmun hrang hrangah hmasawnna hna a thawk a, chu mi tibuai zawnga chet chu thil atthlak tak a ni", a ti. Chief minister beih a nih chungchangah hian state BJP pawhin thuchhuah siamin, Ibobi Singh beitute chu man chhuak a, hremna pek an phut tih an sawi. Party thupuangtu Biren chuan, "Thil thlen dan kimchang hi chhui chhuah ngei ni se ṭha kan ti a, tun hnuah a thlen nawn tawh lohna turin na taka action lak kan duh a ni" a ti.

Manipur deputy chief minister Gaikhangam chuan CM Okram Ibobi beih a nih dan chu a dem thu sawiin, National Socialist Council of Nagaland - Isak-Muivah (NSCN-IM) te chu mawhphurtuah a puh. Gaikhangam chuan NSCN-IM te chet dan chu pawmzam mai theih a nih loh thu sawiin, sorkar laipuiah thlen a nih tur thu a sawi. "India sorkar leh NSCN-IM-te hian cease-fire agreement an ziak a, inremna lo ziah tawh chu an bawhchhia a ni", a ti. State chhung hmun hrang hranga pawikhawihna thlengah NSCN-IM te chu an inrawlh fo thu a sawi bawk. Hetih lai hian Assam Rifles-in NSCN-IM mi leh sa an man pathumte chu tun hnai khan chhuah an ni a, hemi chungchangah hian state sorkar chuan sawisel a tawk nasa hle.

United Naga Council (UNC) leh Tangkhul Naga Long (TNL) te chuan Ukhrul District-a tharum thawhna thleng chu an dem thu an sawi bawk. TNL President Weapon Zimik chuan, Chief Minister programme tibuai zawnga chetna chu a dem thu sawiin, a nunna atan pawha hlauhawm khawpa beih a tawk chu pawmzam mai chi a ni lo, a ti. Hetih lai hian tribal-te'n CM an duh lo an lantir chu dem ngawt theih a nih loh thu a sawi tel bawk. UNC President Gaidon Kamei pawhin, Ibobi-a'n Ukhrul District a tlawh chu boruak ti sosang thei thil a nih thu sawiin, kum 2010-a Mao Gate-a inthahna thleng leh, Churachandpur-a kum 2015-a tharum thawhna thleng pawh chief minister vanga thleng niin a sawi.

Manipur CM-in beih a tawh chungchang hian sawizui a hlawh hle a, mi tam tak chuan Ibobi Singh-a kaihhruai sorkarin 'An-ti Tribal Bills' a pass nghawng zel niin an ngai. 'An-ti Tribal Bills' hi Manipur-a tribal-te chuan an duh lo hle a, kawng hrang hrangin dodalna an lantir. Tribal mi pakuate chuan nunna chan phah tawhin, heng mite hi tribal-te chuan hnam tana martar-ah puangin, tun thlengin an ruang hi phum lohin Churachandpur-ah dah a la ni. Hengte avang hian Singh tan chuan tribal-te chenna hmuna kal chu him tawk lo lehah mi tam tak chuan an ngai a ni.

Manipur Chief Minister Ibobi Singh hi Thawhlehni khan sorkar programme pawimawhah Ukhrul District a pan a, amah leh amah zuitute chuan beih an tawh avangin, CM hi state khawpui Imphal-ah helicopter-a phurh let a ni. CM hi Ukhrul district-ah hian hospital khum 100 awmna leh power sub-station hawng tura kal nia tarlan a ni. Buaina chhuahna hmunah hian hel leh security force-te chu inkap zuiin, security force mi pahnihin hliam an tuar. Inbeihna hmunah hian AK 47 pahnih hmuh a ni a, chhui chian mek a ni.